Aass bryggeri i Drammen selde 40 prosent meir øl til utelivet enn i fjor under dei fire mest intense VM-vekene. Også Ringnes og Hansa merkar stor pågang.
– Vi er veldig glade for resultata Noreg har oppnådd i VM. Og så er det jo slik at øl og fotball er musikk, så det er ikkje heilt uventa at vi har hatt eit oppsving, seier administrerande direktør Lauritz Aass i Aass bryggeri i Drammen til NTB.
Han fortel at mange serveringsstader fylte opp lagera sine før VM for å sikre seg nok øl til kampane.
– Dei fire mest intense vekene under fotball-VM, medan Noreg var med, selde vi cirka 40 prosent over fjoråret i serveringsmarknaden. Dette er basert på tal ut frå bryggeriet, opplyser han.
– Ein solid innsats
Bryggerisjefen seier at salet også har vore godt hjelpt av vêret.
– Det er veldig moro. VM i kombinasjon med godt og varmt vêr gjer noko med tørsten til folk.
Bryggeriet har levert øl til fleire store arrangement, VM-visningar og utestader i sommar. Sjølv om veksten er størst til bedriftsmarknaden, har salet også gått opp til butikkane.
Aass karakteriserer sommaren som «veldig travel».
– Det er ein solid innsats frå dei tilsette når det står på som verst. Når folk ligg på stranda, så blir det jobba her tidleg og seint for å sikre leveransar, seier han.
Hansa Borg: – Hektiske dagar
NTB har kontakta fleire bryggeri for å høyre om VM-salet. Også dei desidert største konserna, Ringnes og Hansa Borg, melder om auka pågang, men har førebels ikkje konkrete tal.
– Vi opplever noko salsvekst frå same periode i fjor både innan øl og alkoholfritt øl, spesielt i uteliv, skriv leiar for kommunikasjon Stina Kildedal-Johannessen i Hansa Borg i ein e-post.
Ho fortel at dei har auka produksjonen for å vere klare til VM og gjennom VM.
– Det er hektiske dagar, både for produksjon, distribusjon og sal, men vi har planlagt godt for å vere leveringsdyktige gjennom VM og resten av sommaren, seier ho.
Ringnes: – Mykje aktivitet
Kommunikasjonsdirektør Johanna Ellefsen Rostad i Ringnes fortel at VM har bidrege med mykje aktivitet, ikkje minst blant kundane i utelivsbransjen.
– Vi har levert mykje god drikke gjennom meisterskapen – både øl med og utan alkohol, brus og vatn. I tillegg nyt vi godt av høgare temperaturar og mykje aktivitet som leverandør av drikke til store festivalar og konsertar, fortel ho.
Ho seier at det er for tidleg å oppsummere tala, men trur dei i sum vil lande ein solid sommar i 2026.
Håpar fleire får opp auga for alkoholfritt
Konstituert generalsekretær Eli Marie Stavlund i alkovit-organisasjonen Av-og-til, seier til NTB at det ikkje er overraskande at det er selt mykje øl dei siste vekene.
– VM vart verkeleg den folkefesten vi drøymde om, og det har vore utruleg gøy å sjå korleis meisterskapen har samla folk, seier ho.
Samstundes meiner ho det er gledeleg at også alkoholfritt øl har hatt ei sterk utvikling under VM.
– Vi håpar det gjer at endå fleire får auga opp for det gode utvalet av alkoholfrie alternativ som finst, og kanskje vel det litt oftare også framover etter nokre fuktige veker.
