Máret Rávdná Buljo ii leat Duiska oaivegávpogii vuolgán čikŋan, go dáppe áigu čalmmustahttit sámiid hástalusaid.
Máret Rávdná Buljo lea vuohččan bovdejuvvon Grüne Wochei.Foto: Nils John Porsanger / NRK
– Manne mii álot áŋgiruššat gáhttet iežamet eatnamiid?
Jearrala fitnodagaideaiggát ja biebmobuvttadeaddji, Máret Rávdná Buljo.
Son áŋgiruššá árbevirolaš sámi borramuša ovddas, ja dainna lea ožžon sihke fuomášumi ja bálkkašumi.
– Dat lea biepmu dihte. Vai mis galgá leat ráinnas biebmu, eatnamat gos min bohccot sáhttet guohtut, ráinnas vuonat ja jogat gos leat guolit ja luosat.
Go son bovdejuvvui Grüne Wochei davviguovllu delegašuvnna mielde, de váruhii ahte áigu iežas oaiviliid gaskkustit.
Sámiid biebmokultuvrra vuođđu
Sus lea jáhkku ahte Grüne Woche, mii lea riikkaidgaskasaš eanandoalo-, biepmo- ja mátkeealáhusmeassu lea buorre arena čalmmustahttit sisabahkkemiid.
– Olgoriikafitnodagat hui dávjá bahkkejit min guovlluide. Dakkár arenain sáhttet oahppat man hearkkit mii leat, oahppat min dovdat. Ja dat galgá leat oamedovdu gáhttet eatnamiid ja oamedovdu ahte ii billis earáid ovddas.
Son muitala dán iežas váibmoáššin, ja sámiid biebmokultuvrra vuođđu.
– Min kultuvra lea ahte bohccot ja dat eallit maid mii borrat, dat leat meahcis. Muorjjit maid mii čoaggit, dat leat maid meahcis vižžon, dat eai leat gilvojuvvon.
