Norsk ost hentar stadig heider for kvalitet og smak. Likevel kjøper nordmenn meir importert ost enn nokon gong.
Tim Reidar Stenberg på ostelageret til Hol ysteriFoto: Tordis Gauteplass / NRK
– Køddar du med meg?
Det var det første Christopher Sjuve tenkte då han på ei matmesse fekk smaka ein ost frå eit lite ysteri i Hol.
– Eg vart heilt slått i bakken.
Både at osten var laga av norsk geitemjølk og faktisk var tre år gammal, overraska den sjølverklærte oste-eksperten.
Mathistorikar Sjuve manna seg opp og serverte ein bit av den norske geitosten til den italienske ambassadøren, som var noko skeptisk.
– Men så sa han noko som er det gjævaste du kan få frå ein italiensk ambassadør, nemleg:
– Den er nesten som parmesan.
– Betre blir det ikkje.
